काठमाडौं - अन्तर्राष्ट्रिय क्रिकेट परिषद् (आइसिसी) ले नेपाल प्रिमियर लिग (एनपिएल) लाई अन्ततः आधिकारिक मान्यता दिएको छ। नेपाल क्रिकेट संघ (क्यान) का अनुसार तेस्रो संस्करणदेखि एनपिएलले आधिकारिक फ्रेन्चाइज टी-२० लिगको हैसियत पाएको हो।
मान्यता कसरी र कहिले आयो?
पहिलो चरण - स्याङ्सन:आइसिसीले गत शुक्रबार नै लिगलाई सञ्चालनको लागि औपचारिक स्वीकृति (Sanction) दिएको थियो। क्यानले एनपिएल मिडिया डे मा पत्रकारहरूसँग कुरा गर्दै गर्दा आफू निरन्तर इमेल स्क्रोल गरेर आइसिसीको जवाफ कुरिरहेको बताएका थिए।
दोस्रो चरण - लिस्ट ए मान्यता: त्यसको पाँच दिनपछि, बुधबार (अक्टोबर २१) मा आइसिसीले एनपिएलका सम्पूर्ण खेललाई आधिकारिक ‘लिस्ट ए टी-२०’ (List A Twenty20) मान्यता प्रदान गरेको क्यानले पुष्टि गरेको छ। यससँगै प्रतियोगिताका सबै खेल अब आधिकारिक टी-२० खेलका रूपमा गणना हुनेछन् र खेलाडीको प्रदर्शन आधिकारिक करियर तथ्याङ्कमा जोडिनेछ।क्यानले भनेको छ, "आइसिसीबाट प्राप्त उक्त मान्यताले नेपाली क्रिकेटको विकास, विस्तार तथा अन्तर्राष्ट्रिय स्तरमा नेपालको घरेलु क्रिकेट प्रतियोगिताको पहिचान थप मजबुत बनाउन महत्वपूर्ण योगदान पुग्ने विश्वास लिएका छौं।"
यो मान्यता किन ऐतिहासिक छ? ५ कारण
१. तथ्याङ्कले अब आधिकारिकता पाउने:पहिलो दुई संस्करणका खेललाई आइसिसीले मान्यता नदिएकाले खेलाडीले बनाएको रन, लिएको विकेट आधिकारिक रेकर्डमा गणना भएको थिएन। अब तेस्रो संस्करणका सबै खेलको रेकर्ड विश्वव्यापी रूपमा मान्य हुनेछ।
२. विदेशी स्टारको बाटो खुला: यसअघि आइसिसीले प्रत्येक टोलीलाई टेस्ट राष्ट्रका बढीमा ४ जना खेलाडी मात्र अनुबन्ध गर्न दिने सीमा लगाएको थियो। अब मान्यता पाएसँगै फ्रेन्चाइज टोलीले विना प्रतिबन्ध अन्तर्राष्ट्रिय स्टार अनुबन्ध गर्न पाउनेछन्। क्यानका अनुसार यसपालि डेभिड वार्नर, शकिब अल हसन, सिकन्दर रजा, मोइन अली, जिमी निसम र भारतका केएस भरत जस्ता खेलाडी अनुबन्धको लागि टोलीले होल्ड गरिरहेका छन्।
३. DRS प्रणाली लागू हुने:सचिव खड्काले एनपिएल मिडिया डे मा तेस्रो संस्करणमा डिसिजन रिभ्यू सिस्टम (DRS) लागू गर्ने घोषणा गरेका छन्। आइसिसीको मान्यता पाएपछि DRS लागू गर्न सहज हुने उनले बताए। यसको लागत १ करोड ५० लाखदेखि २ करोड रुपैयाँसम्म लाग्ने र उक्त खर्च क्यान र फ्रेन्चाइज टोलीले संयुक्त रूपमा व्यहोर्ने बताइएको छ।
४. प्रतियोगिताको स्वरूप:
मिति:कात्तिक ९ देखि मंसिर ५ गतेसम्म (अक्टोबर २६ देखि नोभेम्बर २१, २०२६)
स्थान: त्रिभुवन विश्वविद्यालय अन्तर्राष्ट्रिय क्रिकेट मैदान, कीर्तिपुर
टोली: ८ टोली - बिराटनगर किंग्स, चितवन राइनोज, जनकपुर बोल्ट्स, कर्णाली याक्स, काठमाडौं गोर्खाज, लुम्बिनी लायन्स, पोखरा एभेन्जर्स र सुदूरपश्चिम रोयल्स
खेल संख्या: कुल ३२ खेल, जसमा २८ लिग चरण र ४ प्लेअफ खेल हुनेछन्
उद्घाटन खेल: साविक विजेता लुम्बिनी लायन्स र सुदूरपश्चिम रोयल्सबीच अक्टोबर २६ मा हुनेछ।
५. व्यावसायिक उचाइ: क्यानले यस संस्करणबाट प्रसारण र टिकटबाट करिब ३३ करोड ५३ लाख रुपैयाँ आम्दानी गर्ने लक्ष्य राखेको छ। हिमालय टेलिभिजनले १४ करोड ६४ लाखमा घरेलु टेलिभिजन प्रसारण अधिकार किनेको छ भने NetTV ले OTT अधिकार लिएको छ। दर्शकले नेपालमा ४०० रुपैयाँमा सम्पूर्ण खेल हेर्न पाउनेछन्।
टिप्पणीहरू
Please,Comment what you think about post thing ?