नेपाल-भारत डिजिटल सहकार्यमा नयाँ अध्याय: व्यक्तिगत खातामा सिधै भुक्तानी र एआई अनुवाद

मकाउ, ०७ जुन।  नेपालको डिजिटल तथा वित्तीय पूर्वाधारलाई आधुनिक, सुदृढ र समावेशी बनाउने उद्देश्यका साथ काठमाडौँ विश्वविद्यालय र भारतको डिजिटल इन्डिया भाषिणी विभागबिच एक महत्त्वपूर्ण समझदारी पत्र (एमओयू) मा हस्ताक्षर भएको छ। परराष्ट्रमन्त्रीको हालै सम्पन्न भारत भ्रमणका क्रममा दुई छिमेकी मुलुकबिच प्रविधि, सञ्चार र वित्तीय क्षेत्रमा रणनीतिक सहकार्य बढाउने उच्चस्तरीय सहमति बनेको हो। यस सम्झौता अन्तर्गत नेपालका लागि विशेष रूपमा आवाजमा आधारित आर्टिफिसियल इन्टेलिजेन्स (एआई) प्रविधि ‘भ्वाइस फस्ट’ भाषा अनुवाद प्लेटफर्म र नयाँ राष्ट्रिय डिजिटल पूर्वाधारको द्रुत विकास गरिनेछ। यो प्रविधिको माध्यमबाट नेपालका विभिन्न रैथाने तथा स्थानीय भाषाहरूमा सरकारी तथा सार्वजनिक सेवाहरू उपलब्ध गराउन सकिनेछ, जसले देशका दुर्गम क्षेत्रका नागरिक र डिजिटल साक्षरता कम भएका सर्वसाधारणलाई प्रविधिको मूलधारमा ल्याउन ठुलो मद्दत पुर्‍याउने विश्वास लिइएको छ।

यसैगरी, डिजिटल वित्तीय क्षेत्रतर्फ ठुलो फड्को मार्दै नेपाल र भारतबिचको भुक्तानी प्रणालीलाई अझ व्यापक बनाइएको छ। अब युनिफाइड पेमेन्ट्स इन्टरफेस (UPI) र नेपाल पेमेन्ट इन्टरफेस (NPI) को एकीकरणमार्फत व्यावसायिक कारोबारका अतिरिक्त सिधै एक व्यक्तिको बैंक खाताबाट अर्को व्यक्तिको खातामा (P2P) रकम आदानप्रदान गर्न मिल्ने नयाँ व्यवस्था मिलाइएको छ,  सरकारको प्राविधिक सहयोगमा निर्माण हुने यो एआई प्लेटफर्म र नयाँ वित्तीय प्रणालीले भाषागत र भौगोलिक अवरोधहरूलाई पूर्ण रूपमा हटाउनेछ। यस नवीन कदमले भारतमा कार्यरत लाखौँ नेपाली नागरिकहरूलाई झन्झटमुक्त र सुरक्षित रूपमा रेमिट्यान्स स्वदेश पठाउन सजिलो बनाउनेछ भने सीमापार व्यापार तथा आपसी आर्थिक सम्बन्धलाई अझ पारदर्शी, भरपर्दो र सुदृढ बनाउन ऐतिहासिक कोशेढुङ्गा सावित हुने अपेक्षा गरिएको छ।