नेपाली भाषामै वेबसाइटको डोमेन

मकाउ 21 May, अब नेपाली भाषामै वेबसाइटको डोमेन लिन पाइने भएको छ । सूचना प्रविधि विभागका निर्देशक रमेश शर्मा पौडेलले कम्प्युटर एसोसिएसन नेपाल महासंघ (क्यान महासंघ)को पहलपछि अब नेपाली भाषामै डोमेन लिन पाइने भएको बताए । उनले संवाददातासँग भने, ‘क्यान महासंघ र अन्तर्राष्ट्रिय संस्था आईक्यानको सहकार्यमा युनिभर्सल एक्सेप्टेन्स (यूए) डेको अवसरमा आधिकारिक रुपमा नेपाली डोमेन दर्ता भएको छ । यसले अब नेपली भाषामा डोमेन लिने पाउने बाटो खुलेको छ।’उनले अंग्रेजी भाषामा दक्ष नभएका नेपालीहरूलाई डिजिटल सेवामा जोड्न मद्दत गर्ने बताए । ‘करिब प्रतिशत नेपालीहरू अझै इन्टरनेट पहुँचबाट टाढै छन् । नेपाली भाषामा डोमेन तथा इमेल ठेगाना उपलब्ध गराउनाले उनीहरूलाई डिजिटल सेवामा जोड्न मद्दत गर्छ,’ उनले संवाददातासँग भने । उनले नेपाली भाषामै डोमेन लिन पाउनेगरी विभागले आवश्यक कार्यविधि बनाउने तयारी भइरहेको बताए । ‘हामीले नेपाली भाषामा डोमेन लिन आवश्यक निर्देशिका र कार्यविधिको ड्राफ्ट बनाइसकेका छौं ।

यसमा थप सुझावहरू लिइरहेका छौं,’ निर्देशक पौडेलले भने ।उनका अनुसार अहिले मर्कन्टाइलले डोमेन दर्ताको काम गरिरहेको भए पनि अब नेपाली भाषामा पाउने डोमेनको लेखाजोखा विभागले कार्यविधि बनाएर चाँडै कार्यान्वयनमा ल्याइनेछ । ‘अहिले नेपालमा मर्कन्टाइल प्रालिले डोमेन दर्ताको काम गरिरहेको छ। तर, अब कार्यविधि बनाएरै नै डोमेन दर्ताको काम अगाडि बढाउँछौं।’ उनले भने ।अब सरकारी र सार्वजनिक सेवामा नेपाली भाषाको प्रयोगलाई सहज बनाउने अपेक्षा गरिएको उनले भनाइ छ । ‘यो प्रविधि अन्तर्गत नेपाली भाषामै वेबसाइटको यूआरएल (ठेगाना) लेख्न सकिनेछ  भने यसअन्तर्गत सरकारी वेबसाइटदेखि ईमेल सेवा समेतमा भाषा सहजता ल्याउन मद्दत गर्नेछ ।’ उनले भने ।